ភ្នំពេញ៖ សមាជិកសភាវ័យក្មេង និងជាសមាជិកគណៈអចិន្ត្រៃយ៍គណបក្សប្រជាជនកម្ពុជាលោក ហ៊ុន ម៉ានី បានដឹកនាំក្បួនឃោសនាថ្ងៃចុងក្រោយនៃយុទ្ធនាការឃោសនាបោះឆ្នោតដោយប្រើសារ «សន្ដិភាព» និងប្រកាសប្រាប់ឱ្យអ្នកគាំទ្របក្សប្រជាជនត្រៀមខ្លួនការពារនូវសន្ដិភាពផងដែរ។
ថ្លែងទៅកាន់អ្នកគាំទ្របក្សប្រជាជននៅរាជធានីភ្នំពេញដែលចូលរួមការយុទ្ធនាការឃោសនាបោះឆ្នោតនៅរសៀលថ្ងៃសុក្រ ទី៣ ខែមិថុនានេះ លោក ហ៊ុន ម៉ានី ថា«សន្តិភាព» គឺជាមូលដ្ឋានដែលនាំឱ្យប្រែប្រួលមុខមាត់ប្រទេសកម្ពុជាពីសង្រ្គាមមកជាប្រទេសដែលធ្វើការដោះស្រាយបញ្ហាពិភពលោកដោយស្មើរមុខស្មើរមាត់ជាមួយប្រទេសដទៃទៀត លើឆាកអន្តរជាតិក៏ដូចជាក្នុងតំបន់។ លោកថា សន្តិភាពនេះ ក៏ជាកត្តាចំបងដែលបានផ្តល់ឱកាសអោយប្រទេសយើងអាចផ្តោតអារម្មណ៍ទាំងស្រុង និងប្រើប្រាស់មធ្យោបាយរួមកម្លាំងដើម្បីការអភិវឌ្ឍ ភាពរីកចម្រើន ការបង្កើត និងបង្កើនឱកាសការងារ ព្រមទាំងលើកស្ទួយជីវភាពរបស់ប្រជាជនយើង។
លោកបានប្រកាសឱ្យអ្នកគាំទ្របក្សប្រជាជនត្រៀមខ្លួនជានិច្ចក្នុងការការពារសន្ដិភាពដែលបានមកដោយលំបាកនេះ។
លោកថា៖ «តើការពារសន្ដិភាពតាមរបៀបណា? ទី១ ចេញទៅបោះឆ្នោតទាំងអស់គ្នាជូនគណបក្សប្រជាជនកម្ពុជា ទី២ ប្រសិនជាមានរូបភាពអាណាធិបតេយ្យមួយណាគឺយើងត្រូវត្រៀមខ្លួនរួចជាស្រេចចងចាំនូវអ្វីដែលខ្ញុំបានលើកឡើង ហើតនឹងត្រៀមខ្លួនក្នុងការការពារសុខសន្ដិភាពក្នុងតម្លៃណាក៏ដោយ»។
លោកបានហៅអ្នកគាំទ្រគណបក្សប្រជាជនថាជាជំរុំទេវតានឹងជំរុញឱ្យអ្នកគាំទ្រគណបក្សប្រជាជនបន្តការពារជាតិ សាសនា ព្រះមហាក្សត្រ និងការពាររបបរាជានិយម។
លោកថា៖ «គណបក្សប្រជាជនកម្ពុជា ការពារសុខសន្តិភាពដែលជាមូលដ្ឋានគ្រឹះនៃសេដ្ឋកិច្ចជាតិ និងការអភិវឌ្ឍ។ សន្តិភាព និងការអភិវឌ្ឍ គឺជាមូលដ្ឋានដើម្បីភាពរីកចម្រើនក្នុងគ្រប់ទិដ្ឋភាពសង្គម ជាពិសេសកិច្ចការងារដែលបានផ្តល់ចំណូល និងលើកស្ទួយជីវភាពប្រជាជន។ នេះគឺជាអនាគតកម្ពុជាក្រោមម្លប់នៃសន្តិភាព»។
គណបក្សប្រជាជនកម្ពុជាត្រូវបានបង្កើតឡើងនៅ ថ្ងៃទី២៨ ខែមិថុនា ឆ្នាំ១៩៥១ ដោយអ្នកជាតិនិយមកម្ពុជាដើម្បីរំដោះជាតិកម្ពុជាពីអាណានិគមបារាំង។ គឺជាគណបក្សដែលចំណាស់ជាងគេនៅ កម្ពុជា ហើយបានដឹកនាំការតស៊ូរំដោះប្រជាជនកម្ពុជាពីរបបខ្មែរក្រហមនៅ ឆ្នាំ១៩៧៩ និងបានដឹកនាំប្រទេសមកដល់បច្ចុប្បន្ន។
បច្ចុប្បន្នគណបក្សនេះដឹកនាំដោយសម្ដេចតេជោ ហ៊ុន សែន ជាប្រធាន និងមានអនុប្រធាន ៤រូបគឺសម្ដេចក្រឡាហោម ស ខេង និងសម្ដេចវិបុលសេនា សាយ ឈុំ សម្ដេចពិជ័យសេនា ទៀ បាញ់ និងលោកស្រី ម៉ែន សំអន ហើយសម្ដេចពញាចក្រី ហេង សំរិន ជាប្រធានកិត្តិយស៕
